Tintin

Ich häng’ stundelang vorm Tivi, spiel’ Computer bis id’Nacht,
mit den Eltre han i deshalb immer Krach.
's het no en nigel-nagel-neue Werchzüügkaschte in unserem Huus,
doch mit Zange, Hammer und Nägel kumm i nid drus.
Ich ha Lego-Technic, Drache, e paar Bänd vom Papa Moll
Und jetzt isch mis Zimmer pumpehagelvoll.
Aber gar nüt het mi aagmacht, bis mi Tante'n'emol isch ko
Und do hett si für mi e Comic liege glo.

Eimol isch d’ Tante Cecil zur Wiehnacht ko
hett e Gschenk uf e Tisch glait und xait:
I bi gspannt, ob’s Dir gfallt und wie Du das findsch
Denn mit Computerspiel und Viereckaugä bin i im Clinch
D’Tante Cecil, die isch jo scho ursteialt,
d’ Lara Croft würd’ sie mir niemols gäh –
aber d’Cecil find ich megagigacool
sie het mir de Tintintintin
sie het mir de Tintintintin.....gäh.

's isch egal, ob’s Ziischtig, Mittwuch, Dunnschtig, Fritig, Samschtig isch,
s Fernsehheftli hani lang nümme gsuecht.

In der Hängematte lies i „On a marché sur la lune“

Und am beschte gfallt’s mer, wenn de Haddock fluecht.
Und de Käpt’n stiigt grad us de Mondrakete zmitt’s ins All,
und dr Tintin goht en go rette wi in jedem Fall.
guet git’s dä Käpt’n nebä'n'em Tintin und em Milou,
denn für mi isch dr Haddock dr grossi Clou.

Eimol isch d’ Tante Cecil zur Wiehnacht ko,
hett e Gschenk uf e Tisch glait und xait:
I bi gspannt, ob’s Dir gfallt und wie Du das findsch
Will mit so MonschterKarte und Merchandising bin i im Clinch
D’Tante Cecil, die isch jo scho ursteialt,
Yu-Gi-Yo würd’ sie mir niemols geh –
aber d’Cecil find ich megagigacool
sie het mir de Tintintintin
sie het mir de Tintintintin.....gäh.

Mi Französisch-Lehrer sait: „Sag, wo hesch de Spick?
Wörtli hesch du doch no nie so guet gleehrt.
Jetzt schriibsch glatt e Sechser und i glaube, do git’s e Hick,
also sag mr sofort, was lauft denn do verkehrt!“
Ich zieh langsam, langsam dr Tintin usem Schuelsack unterem Pult
Und sag:“Luege Sie do, dä Comic isch dra d'schuld,
denn i lies ihn fascht jede'n Obä i miim Bett bis spot in d'Nacht
mit dr Taschelampe susch schlön mini Eltere Krach.“

Eimol isch d’ Tante Cecil zur Wiehnacht ko,
hett e Gschenk uf e Tisch glait und xait:
I bi gspannt, ob’s Dir gfallt und wie Du das findsch
Denn mit Computerspiel und Viereckauge bin i im Clinch
D’Tante Cecil, die isch jo scho ursteialt,
sone Playstation würd’si mir niemols geh –
aber d’Cecil find ich megagigacool
sie het mir de Tintintintin
sie het mir de Tintintintin.....gäh.

 

back home to Mensch
andere CD's other CD's